|
Statssekretær Heidi Sørensen (i midten) i Miljøverndepartementet
tok godt imot Ingrid Opedal frå Møre og Romsdal
SV (t.h.) og May Britt Haukås frå Runde Miljøsenter.
God dialog
13. januar 2011
- Runde Miljøsenter står for så viktige
oppgåver at det offentlege må bidra økonomisk.
Det seier Ingrid Opedal i Møre og Romsdal SV. Ho
tok initiativet til eit møte i Miljøverndepartementet
der løyvingar til miljøsenteret var tema.
Å få offentlege midlar er inga enkel sak.
Det er mange om beinet, og mange gode formål som
treng statlege løyvingar. Derfor tok Ingrid Opedal
initiativet til eit møte med statssekretær
Heidi Sørensen og to av rådgjevarane i Miljøverndepartementet
for å tale Runde Miljøsenter si sak. Med på laget
hadde ho også stortingsrepresentant Svein Gjelseth
frå Ap, og May Britt Haukås frå miljøsenteret.
Å formidle kunnskap om dei rike ressursane og det
sårbare økosystemet i havet på Mørekysten
er ei av dei viktigaste oppgåvene ved Runde Miljøsenter.
I hovudsak skjer det gjennom foredrag for besøkande.
Men det blir også arbeidd med å bygge opp eit
stort informasjons- og utstillingssenter. Her blir Rundeskatten
og modellen av den forliste seglskuta Akerendam viktige
attraksjonar, men senteret skal også vise samspelet
mellom havstraumar, planktonoppblomstring, sild og annan
fisk, og følgjene det har for livet på og
ved fuglefjellet. Los- og fyrhistorie, forlis, oljeforureining
og energi frå havet blir andre tema.
Informasjons- og utstillingssenteret er kostnadsrekna
til 10 millionar kroner, og er avhengig av eit spleiselag
mellom det offentlege og næringslivet for å bli
realisert. Om Miljøverndepartementet kan bidra med
løyvingar står att å sjå, men etter
møtet er Ingrid Opedal svært optimistisk:
- Dette var eit uvanleg hyggeleg og nyttig møte,
eg syns vi fekk svært positive signal, seier ho.
|
