|
Idémyldring om oljevern
29. oktober 2010
Kva må til for å hindre alvorlege miljøskadar
ved oljeutslepp? Er det råd å tenkje heilt annleis
enn det som har vore gjort til no, og å utvikle utstyr
som faktisk fungerer i all slags ver? Det er tema når
12 personar med ulik bakgrunn møtest til idémyldring
om oljevern ved Runde Miljøsenter tysdag og onsdag
2. og 3. november.
Oljekatastrofen i Mexico-golfen har demonstrert for heile
verda at det ikkje finst godt nok utstyr til å hindre
enorme skadar når ulykker skjer. Forsking og utvikling
av oljevernutstyr har vore nesten fråverande dei siste
30 åra. Det vi har å hjelpe oss med i dag er:
- Oljelenser som fungerer berre
når der er lite bølgjer.
- Dispergeringsmidlar:
Kjemiske stoff som løyser opp
oljen på havoverflata, men som ein veit lite om korleis
påverkar miljøet under havoverflata og på havbotnen.
Dei enorme mengdene slike stoff som vart brukte i Mexico-golfen
kan vere eit mykje større miljøproblem enn
sjølve oljen – men på overflata ser
det bra ut.
- Skimmer:
Utstyr for å skrape opp oljen frå havoverflata,
men dei verkar heller ikkje i bølgjer...
- Manuell opprensking i strandsonen med greip og spader.
Nettopp
det å samle folk med heilt ulike erfaringar
og kompetanse kan vere det som skal til for å kome
fram til heilt nye løysingar, trur Baard Røsvik
i Kongsberg Devotek AS og Sigbjorn Notøy i PLANY AS,
som arrangerer idémyldringa i samarbeid med Runde
Miljøsenter. Deltakarane har til saman praktisk erfaring
frå oppryddingsarbeidet i Mexico-golfen, vasking av
oljeskadd sjøfugl, produktutvikling, og skipsbygging.
Bland deltakarane vil det også vere ein kjemiingeniør,
ein ekspert på bølgjer, og ein som både
er arkitekt og spesialist på oljevernutstyr.
For at idéane skal kunne myldre, må deltakarane
kjenne seg frie til å kaste fram det dei kjem på i
samspelet med dei andre. Derfor får ikkje media vere
til stades under sjølve myldringa. Men journalistar
er velkomne til å snakke med deltakarane kvar for seg
i pausene, og til å ta bilde av gruppene.
|
