Runde Miljøsenter - Med naturen som modell

Det er spennande å sjå korleis resultatet av komposteringa har blitt! Suel Kassembo (t.v.) og Rocco Schwalm tømmer kompostbingane ved Runde Miljøsenter.

- Å produsere søppel må vere det mest ufornuftige som finst, seier William McDonough, ein av dei to grunnleggjarane av Cradle to Cradle-konseptet. Dette er også Runde Miljøsenter sin filosofi: Kvifor kaste i søpla det som i staden kan bli nyttig, både for naturen og lommeboka?

Det er berre menneska som produserer søppel. I naturen blir overskotsmateriale, som til dømes visne blad, til ny næring som skaper ny vekst.

Om menneska tenkte på same måten, heile vegen frå produksjon via forbruk til avfall, ville framtida sjå lysare ut for oss alle. Søppelproblema ville bli løyst, dei skadelege CO2-utsleppa ville stoppe, og menneska sin aktivitet ville bli eit gode for naturen. Det meiner dei to grunnleggarane av Cradle to Cradle-konseptet (C2C), den tyske kjemikaren Michael Braungart og den amerikanske arkitekten William McDonough.

Ny tenkjemåte
– Kvifor må industriproduksjon vere til skade for naturen, undra dei to grunnleggjarane, og utfordra med det den vanlege tankegangen om at ting som blir produserte har ei viss levetid, og så blir søppel. I staden ser dei for seg ei framtid der vekst og auka forbruk blir eit gode, ikkje berre for menneska, men også for natur og miljø.

Frå vogge til vogge heiter konseptet på norsk. Det betyr at alle ting skal kunne starte på ein ny og nyttig livssyklus etter bruk.

Ny industriell revolusjon
I dagens industrielle produksjon blir det brukt store mengder kjemikaliar og gift, og den skaper enorme mengder avfall og forureining. I C2C er visjonen at alle produkt blir laga av reine materiale, som etter bruk kan gå tilbake til naturen, eller bli til nye produkt.

Ved Runde Miljøsenter er tankegangen til C2C langt på veg realisert. Dei miljøvennlege tekniske løysingane for vatn-, varme- og sanitæranlegg førte til at senteret fekk VVS-prisen 2010. I tillegg har senteret både golvteppe og stolar som er laga av 100 % miljøvennlege materiale, og som det er panteordning på. Det betyr at når dei er utslitne, blir dei returnerte til produsenten, som så brukar dei opp att til nye produkt.

Tilbake til naturen
- Tenk om menneska kunne gi tilbake til naturen, ikkje berre bruke opp, er visjonen til C2C. Ein enkel måte å oppnå det på, er ved å kompostere matavfallet i staden for å kaste det i søpla. Då blir matrestane til ny jord, som det kan produserast ny mat eller planter i.

Dette blir praktisert ved Runde Miljøsenter. Det er både enkelt, og mykje rimelegare enn å kjøpe jord i plastsekkar. Kjekt er det også, når bingane kan tømast og resultatet er klart: Kasse på kasse med feit og fin matjord. Når våren kjem, blir det nytt liv i matavfallet frå kjøkkenet ved Runde Miljøsenter.

Potetskrell, klippfiskbein og anna matavfall har fått nytt liv: Her er det mykje god matjord å plante i til våren! Rocco Schwalm (t.v.) og Suel Kassembo ved Runde Miljøsenter har all grunn til å vere nøgde med resultatet av komposteringa.