|
Ny sjef ved miljøsenteret
09. november 2011
Tor Sindre Steinsvik er ny dagleg leiar
ved Runde Miljøsenter.
Foto: May Britt Haukås. Tor Sindre Steinsvik (55) er tilsett som ny dagleg leiar ved Runde Miljøsenter. Han seier det er ei kjempeutfordring, og at han gler seg til å ta fatt.
Runde Miljøsenter har leita lenge etter den perfekte personen til å ta over den daglege administrasjonen ved senteret.
- Og så fann vi han i eigne rekkjer, seier styreleiar Jan Driveklepp. Steinsvik har vore Herøy kommune sin representant og styreleiar for Runde Miljøbygg sidan før bygginga av senteret starta. I tillegg er han med i styret til Runde Miljøsenter, som altså leiger lokale av Runde Miljøbygg.
Mykje jobb
Sidan opninga av senteret har medeigar og gründer Nils-Roar Hareide hatt ansvaret for både den daglege drifta av senteret og forskingsavdelinga. Med den store auken i forskingsoppdrag, er ikkje dette lenger råd å kombinere. Hareide skal for ettertida konsentrere seg om å leie forskingsaktiviteten ved senteret, medan Steinsvik tar ansvaret for administrasjonen. Det er ei løysing begge er svært godt nøgde med: Hareide ser fram til å få fokusere meir på forsking, og Steinsvik ser det som ei stor og viktig oppgåve å bidra til å utvikle senteret vidare og skape enno fleire kompetansearbeidsplassar i Herøy.
Allsidig leiar
Tor Sindre Steinsvik er ein samfunnsengasjert praktikar med lang erfaring både frå eiga gardsdrift, produksjon av fiskereiskapar og arbeidsklede. Han har brei politisk erfaring, og er no varaordførar for Høgre i Herøy. Sidan 2002 har han vore styreleiar i Herøyspelet, og har også ei rad andre styreverv. Dei siste14 åra har han vore tilsett ved Fristads Norge i Dragsund, dei siste åra som driftsleiar. Han seier han gler seg til å vere med på å utvikle Runde Miljøsenter til ein leiande forskingsstasjon både nasjonalt og internasjonalt.
|
